Chhota Baccha Lyrics

Kal puraani copy ke peechhe maine kuch apna dekha
Bachkaane gaanon se bhara hua ek panna dekha
Woh panna maano ho kayi yaadon ki khidki usmein
Chhota sa baccha aur bacche ka badaa sapna dekha

Woh baccha dekha maine jabhi dekha darta dekha
Class ki bench par rota bilakta padta dekha
Jhuka sa kandha dekha bhaari sa basta dekha
Ek chhota sa baccha aur bacche ka bada sapna dekha

Chooke nishaana phir bhi milunga kamaan lekar
Bachpan se seekha ki kahan jaata imaan lekar
Ke zindagi bhi ekdum saanp seedhi jaisi
Agar banunga main saanp toh pahonchunga bas 99’ve tak

Zimmedaari ka daldal sapne ka paanv phasa diya
Khilauna mila khelne ka chaav gava diya
Par bhagwan bhi yeh shaayad se bacche jaisa dekhte hee
Baarish zindagi kaagaz ko naav bana diya

Gham toh sab ko hote hain meet bas ubharna nahi chaahte TUM
Maine ghar bikta dekha woh dukh zaraa nahi jaante TUM
Maa baap karze mein beshaq thay par sikhaayi ek baat
Chhota hone mein diqqat jab badaa banna nahi chaahte TUM

Bahaane nahi maare
Pankhe se khwaab nahi taange
Gareebi taangein bhi kheenche
Qareebi taane bhi maare

Chhoote saare darwaze
Par toote taare nahi maange

Maa ne umeedein hain baandhi haathon PE dhaage nahi baandhe

Sab se bhaari cheez iss baste mein ek khaali dawaat
Kahani saari uss bacche ki main bas khaali awaaz
Aaj shaayad halka na hopaaye tere khwaabon ka bhaar
Par uss bacche se kehna chaahta hoon ek aakhri baat

Yaad hai sochte thay hum ki kya boondein sochti hongi
Jab girti hongi asmaan se boondein khojti hongi
Ki kya banungi main
Kya bujhaungi koi pyaas?
Kya bujhaungi koi aag?
Kya bachaungi koi jaan?
Ya koi marta hua jhaad?

Aur sochte sochte giri boond uss talaab mein
Talaab mein hazaaron hongi boond shaayad laakh mein
Toh talaab mein uss boond ki pehchaan kya
Aur hum bhi toh hai boond hum mein khaas kya?
Par hum mein himmat haina jalne ki toh hum
Phir pahonchenge aasmaan mein aur hogi phir barsaat yahan

Tab bujhaayenge koi pyaas
Tab bujhaayenge koi aag
Tab bachaayenge koi jaan
Ya koi marta hua jhaad

Kal purani copy ke peechhe phirse kuch apna dekhun
Pehle se behtar gaane bharne ko ek panna dekhun
Woh panna bann jaaye phir yaadon ki khidki usmein
Ek chhota sa baccha aur bacche ka badaa sapna dekhun

Iss bacche ka badaa sapna dekhun
Iss bacche ka badaa sapna dekhun
Iss bacche ka badaa sapna dekhun